كتب هذا البوست يوم امس و لكن بسبب تقطع الانترنت المستفز و من ثم انقطاعه اقدمه اليكم اليوم !!
آنه اللي مستغربته انه مافي مجال للمقارنة بين جو البحرين و ملابس العيد المعروضة بسوق البحرين , لمه تدش أي محل ملابس تاخذ انطباع ان النخل عندنه حزة الكريسماس يتغطى بالثلوج اما الرياح السيبيرية فحدث و لا حرج !! و لمه اتيي على الاقل تحاول تستوعب المعروض علشان العيد ياي و انت لازم تشتري حق العيد ......
بس ما تقدر و تلاقي روحك بتطفش من الحر ان فكرت لمجرد التفكير ان تتخيل روحك لابس قطعة من المعروض !! الحمدلله اللي قدرت اشتري ملابس تتناسب نوعا ما مع الجو المتوقع وقت العيد و لايطوفكم بعد في bhs عطوني كوبون سحب على outlander و آنه وحدة طول عمري اكن احترام ان شالله يكون متبادل بيني و بين سيارات الجيب و هم بهذه الطريقة اتبعوا ماتحدث عنه انتوني روبنز واصفا اياه بأسلوب التكيف 5 و اللي يقول في نصه .. يعتبر نظام الجوائز غير المتوقعة من اكثر ادوات التدريب قيمة سواء مع " الدولفين " او مع الانسان , فأذا كان " الدولفين " لا يؤدي عمله جيدا , فسوف يقوم المدرب باعطائه سمكة على اية حال من حين لآخر , و بغير سبب وجيه واضح . كثيرا ما ينشط هذا النوع من الجوائز الدولفين على البدء في القفز ثانية .
في المرة القادمة التي تشعر فيها انت , او أي شخص آخر بالاحباط , ربما يكون ما تحتاج اليه هو جائزة غير متوقعة , و هو احد اشكال العلاج التي لا يحتاج الشخص للعمل من اجله , و لكنه يعد كافيا لايقاف نمو السلوك الحالي الممل و و يحث المتلقي على محاولة القيام بشيء جديد و بالمثل , فأن اعطاء شخص ما مكافأة كبيرة اكبر مما يتوقع على السلوك الممتاز سوف ينتج عنه جهود اقل من جهوده العادية في المستقبل !
هل تعرف شخصا في حاجة الى الجائزة الكبرى , او يستحقها اليوم ؟ ..
و بجذي حتى لو الملابس ما تناسب الجو احنا نتوقع منك ياللي رايح السوق تشتري انك تشتري خو احنا مو مقصرين و قاعدين نعطيك تحفيز !!
نرجع حق موضوع السحب .. موضوع اليانصيب وايد كان يشكل لي حلم و آنه صغيرة لدرجة ان قمة احلامي و اكثرها جمالية لمه اتخيل روحي فايزة باليانصيب و محصلة مليون دينار !! مستلمتهم تقسيم يتسم بالعدل و الحقانية , اول شي بعطي الفقارة , بعدين بعطي امي و ابوي و اخواني , بعدين بشتري لي سيارة و بعدين بخش فلوس حق دراستي , بعدين بسافر كل انحاء العالم و بسوي لي بيت عووود فيه حمام سباحة و الباقي بخليه في البنك , لكن و على غرار ليش لون البحر ازرق ؟ لان السما زرقة و لمه لونها ينعكس على البحر نجوفه ازرق بعدين يوم خذيت مقرر حيا 222 " علوم البحار " عرفت ان اول ما تبتدي الاطياف اللي هي الاحمر و البرتقالي و الاصفر و الاخضر و النيلي و البنفسجي تدخل الماي يمتص منها اللون الاحمر و هكذا دواليك ليمه يبقى بالاخير اللون الازرق و هو اكثرهم استمرارية من جذي
نجوف البحر ازرق !! لذلك صرت انظر حق ليش لون البحر ازرق ؟ نظرة مختلفة هاي نفسه اللي صار معاي حق حلم اليانصيب بومليون أي اني قمت انظرله بنظرة مختلفة من عقب ما تعبت و انا اسأل نفسي سؤال ما القى له اجابة .. هالسؤال يقول : هل انا مستعدة حق مبلغ بهذا الحجم ؟ هل آنه قد اني اربح مليون دينار و مبلغ مثل هذا قلب حياة وايد ناس فوق حدر و تحول بقدرة قادر من نعمة الى نقمة ؟؟ سؤال صعب شوي لكن هذا ما يمنع ان في اوقات كثيرة عصير فراولة و هوا منعش ممكن يعطونك شعور انك مالك الدنيا و ما فيها حتى لو ما عندك مليون .. بما ان احنا ايسنا من قدوم اللشته قررنه نكون ايجابيين اكثر تجاه هكذا مشاعر و نحاول نستمتع بالمتوفر ( و هو في هذه الحالة الجو ) من جذي رحنا الكورنيش عشان نشم شوية هوا .. الجو كان عالمي و القعدة و جدامك البحرمع عصير فراولة , تشوف الاضواء و جسر المحرق شي شي .. انصحكم في روحة الكورنيشات هالحزة انتهزوا الفرصة قبل لا ايي البرد هذا اذا اذا اذا يه !!
18 ديسمبر, 2007 10:44 ص