ورق مخطط

هالادمية الي تجوفون صورتها اهني اسمها " باريس هيلتون " عندها فلوس متلتلة لا اول لها و لا آخر وارثتها ابا عن جد , جميلة بنظر الكثيرين بس مو بنظري , غبية يعني مريحة راسها و على قولة المتنبي " ذو العقل يشقى في النعيم بعقله و اخو الجهالة في الشقاوة ينعم " , الباب مفتوح لها عشان تسوي اللي تبيه من غناء عرض ازياء و تمثيل يعني ما يحتاي تذل نفسها و توقف في طوابير وحدة من هالبرامج على سبيل المثال " امريكان آيدول " عشان تحصل لها فرصة

حبيت اقول حق هالانسانة تراج عورتي راسي كل ما افتح تلفزيون , جريدة , مجلة  او اي وسيلة اعلامية كانت ان تكون اجوف صورتج بهالابتسامة الغبية و جان زين على شي يشرف الا داشة من السجن الا طالعة من السجن , مرة صايدينج مخمورة  و مرة كاسرة خاطرهم ليش انه نفسيتج تعبت من السجن

 ادري ان للشهرة سحر لا يقاوم " مع اني و الحق يقال ما جربته " و ان الباباراتزي يونسون و يشبعون الغرور بشكل كبير بس بعد لا تنسين اشصار في ديانا سبتهم

و حبيت ابشرج انتي كأنسانة صرتي " نموذج " يحاول كل الاثرياء اخذ العظة منه عشان ما يطلع احد من عيالهم زي حلاتك حتى لو كنتي كما قال جدك " انها الوحيدة في العائلة التي تكسب كل هذا المال الوفير . ثم انها تزيد في شهرة سلسلة هلتون . انها افضل مسئولة اعلانات و علاقات عامة "

و اذا انتي حابة نتذكرج بشي زين تلاحقي عمرج ترا ما باقي شي و يأفل نجمج اذا كان اعتمادج لاكتساب الشهرة على الجمال و الفضائح

هذا و السلام ختام