ذهبنا بالامس الى الخبر على الرغم من كل ما تناقلته الصحف المحلية عن الازدحام الخانق على الحدود و صوب الجوازات , طلعنا من البيت الساعة خمس الا عشر عصرا , آنه و ابوي و اختي اللي كانت يايبه وياها غرشة ماي عنحساب حق الرحلة , حتى ما طلعنه من الفريج الا قاعدة تشرب منها لا صج معذورة عطشت من المسافة لووول , وصلنه الخبر الساعة سبع الا ثلث , ليش ؟! لانه ظلينه ساعة و نص على الجوازات و الساعة و نص هاذي بدون زحمة كان ممكن توصلنه الخبر من زمان صحيح الطابور كان يمشي بس ببطء شديد !! , اهني صرت اتصفح كتاب كان بيدي و اختي كانت تقرا لوحات السيارات السعودية : ف ص د , ل م ح , ه م خ مللتني ما خلت سيارة ما قرت حروفها مادري اشلون كان ابوي مستحملها صراحتن , المهم اول ما عدينه الاجراءات رحنه الحدود نصلي بعدها كملنه طريجنه للخبر بأتجاه مجمع الراشد , وصلنه مجمع الراشد على صلاة العشا من جذي كل المحلات كانت مصكوكة فأنتظرنه شوي ليمه فتحت مكتبة جرير و اللي كانت هدفنا الاساسي من هالسفرة , التجوال في مكتبة جرير جدا ممتع آنه رحت صوب الكتب و اختي راحت صوب اللوحات و ادوات الرسم بينما الوالد راح صوب الالكترونيات و اشتريت خمسة كتب :
نبتدي من اليمين الى اليسار :
1) كتاب مالكوم اكس " النصوص المحرمة " تصفحته و شفت انه يستحق القراءة خصوصا بعد ما شفت الفلم اللي يروي سيرة حياته و هو من بطولة دنزل واشنطن اذا ما خاب الظن.
2) " خيار الصفر " هاذي الرواية بعد ما قريت النبذة اللي موجودة في غلافها من ورا حسيت انها تستحق القراءة فخذيتها
3) " ذكريات سمين سابق " لتركي الدخيل , هذا الكتاب اول ما نزل في المكتبات و شفت تركي الدخيل يتكلم عنه في مقابلته مع زاهي وهبي في " خليك بالبيت " صار خاطري اقراه لمجرد الفضول و يوم رحت المكتبة قال لي البياع انه النسخ كلها خلصت , فتفاجأت و سعدت في الوقت عينه , يوم شفت باقي منه نسختين في مكتبة جرير فاشتريته و اخيرا عشان اشبع فضولي p:
4) " مذكرات شاب غاضب " صار ودي اقرا حق انيس منصور مرة ثانية وجذبني لون الكتاب و العنوان و بعد التصفح قررت آخذه
5) " كشف اسرار السي بلس بلس " السي بلي بلس المعضلة هاذي المادة , معظم " و ليس الكل " الدكاترة اللي يدرسونها بتخصصي يعطون الطالب شعور بالعجز و التخلف و عدم الفهم مع انه اللي يدرسون علوم حاسوب يقولون انها من احلى المواد اللي خذوها , صحيح اني نجحت في مقررين السي بلس بلس اللي اخذتهم لحد اللحين بس عشان افهم شسالفة و اقدر اواصل اشتريت هذا الكتاب اللي يعلم ذاتيا السي بلس بلس و ان شالله استفيد منه
و طبعا كل كتاب اخلصه لازم بكتب لكم عنه في المدونة :)
طلعنه من جرير على الساعة تسع و نص تقريبا و كان زحمة شوي صوب المحاسبة لان عشان القرطاسية و بعدين رحنا سينابون بناء على رغبة الوالد , طلعنه من الكافيه على العشر جذي , دخلنه محلين بس بعدين كل المحلات صحكت فطلعنه من المجمع و قلنه مافي الا جيان فاتح لنا هالحزة لانه يصك الساعة 12 , فرحنه جيان اللي بمجمع الظهران يتميز هذا الجيان انه اوسع بوااايد من جيان مجمع البحرين و يبيع وايد بضائع مو موجودة في جيان البحرين اضافة الى نقطة هي الاهم انه على الزحمة اللي فيه صوب المحاسبة كان فاضي و هذا شي جدا مريح بس ممكن جيان البحرين يتميز عنه بأنه مرتب اكثر و البائعين ممكن تحصلهم بسرعة عشان تسألهم عن سلعة معينة , من ابرز الاشياء اللي اشتريتها من جيان : عصير العنب الفوار حق اخوي و قوطي شبس ليز لانه شكله حلو لوول
من ملاحظة شخصية
تتميز شوارع السعودية انها واسعة بس اللي يسوقون فيها مو كلهم يعرفون يسوقون , رحنا بعدين كودو اللي بكورنيش الخبر و تعشينه هذا هناك .
ماهذا الهرم ؟!
هل هو خوفو
لا
هل هو خفرع
لا
هل هو منقرع
لا
هل نحن في مصر اساسا
لا
اذا ماهذا ؟!
انه كودو السعودية لوووول
في السعودية بس !! تقدر تسمع الفلبينو اللي يشتغلون بالمطعم يتحجون عربي عدل و زيادة على جذي يقولون " هلاو الله " لوول , كانت الساعة جذي وحدة الا... نص الليل و بعد ما تعشينه كان الوقت كلش متأخر فكان لابد لنا من العودة , في طريج الرجعة ما كان في زحمة ابدا من جذي وصلنه البيت على الساعة ثنتين و شوي و في الختام هذا السؤال : هل كان في الرحلة سلبيات ؟! اممم كنا المفروض نروح قبل بوقت عشان جولة التسوق اللي طافتنا بس بشكل عام وايد استانسنا , اما عن الجو فكانت الرطوبة غييير طبيعية اللي يسمعني يقول ياية من اكثر بقاع الارض خلوا من الرطوبة p:
و هاذي صورة جذي على الماشي قبل لا اختم البوست :)
08 سبتمبر, 2007 05:39 م