وايد احب في المسلسلات كاركتر المرأة اللي عادة تكون خمسينية قاربت على الستين , ذات الوزن و الثقل الاجتماعي الكبير في المحيط , كيف لا و هي التي عاصرت كل الاحداث اللي صارت في محيطها من جذي تعد مرجعا لاخذ المشورة بالاخص من قبل الناس اللي تحل و تربط بالقرية عشان عنحساب اهيا حكيمة و تلاقونها في الوقت عينه لو شنو قطت من حجي و تعليقات لاذعة , محد يحط في خاطره او يعصب عليها , و دايما بين مشهد و الثاني من الراوية او المسلسل تلاقونها تكشف عن سر خطير محد يعرف عنه او ممكن كان يندفن معاها لو اهيا ماتت و هالسر ممكن يقلب كل احداث القصة فوق تحت مثل اللي صار في مسلسل سوري ما اتذكر اسمه ان الداية يات باللحظة الاخيرة حق المختار و قالت له يا مختار ثريا ما تقدر تتزوج اللي مادري شسمه نسيته بس كان متين لانهم اخوان بالرضاعة !! و اللي صار في المسلسل البحريني " نيران " يوم ام الخير قالت حق احمد السقاي عن سلمان ولد بن زيدان .. معقدة السالفة شوي لووول بس يبيلكم تجوفون المسلسل !! ,
و هي على الرغم من كونهارابطة الجأش
و ياما و ياما مرت عليها ظروف الا انها حنونة جدا مع الاطفال و تعد المناصرة الاولى و الاكثر اهمية بالنسبة لهم لما تمتلكه من نفوذ حماية ان لم يكن باليد فهو باللسان الطويل , اتمنى اشوف هالكاركتر في وحدة من مسلسلات رمضان هالسنة , شخصيا ما قررت اشبجوف هالسنة و لا القيت نظرة على الدعايات اللي تنحط قبل رمضان بجم يوم يمكن بس المسلسل اللي شفت دعايته لانه حطوها قبل بشهر من رمضان مسلسل الملك فاروق بس مو ناوية اجوفه اولا لانه غير مشجع برغم الازياء و الانتاج اللي شكله مكلف و ثانيا لانه شبعنا من سيرة الملك فاروق في كل مسلسل مصري !!
كتبت كل الكلمات اللي اعرفها في قوقل لوصف سيدة عجوز عشان احصل صورة تناسب البوست و ما حصلت , من جذي قلت حق روحي مافي الا ترسمين وحدة من خيالج و تصورج , و ماجذبت خبر بطلت برنامج البينت و رسمت شي على السريع و طلعت معاي الرسمة اعلاه اللي سميتها "ام الخير"
طبعا اهني ام الخير كاشخة تبي تروح العرس , لابسة ثوب النشل وحاطة الكحله و الديرمه ما اجوف الا واحد من عيال عيالها ياي لها يشتكي مادري مين اللي طاقه , و اذا بها تؤجل روحة العرس فزعه لصغيرها فتذهب الى المطبخ لاخذ " العسو " و العسو لمن لا يعرفه هي المكنسة اللي تستخدم قديما و المصنوعة من سعف النخيل , و تمشي مهرولة نحو الجناة و تقول ليش تطقووون الياهل هاااااا !! فأصبحت بذلك حمامة سلام بنظر المجتي عليهم بينما هي حمامة عسو بنظر الجناة و ياك الموت يا تارك الصلاة !!
11 سبتمبر, 2007 03:38 م